WARGA RAJO AGAM MENGUCAPKAN SELAMAT ATAS TERPILIH NYA JON ARMAN SUTAN BANGSAWAN SEBAGAI WALI NAGARI BARUNG BARUNG BELANTAI

Alhamdulillahi rabbil ‘alamin.

Jo rahmat Allah SWT, jo mufakat anak nagari, kami manyampaikan salamat jo sukses ateh tapilihnyo Jon Arman Sutan bangsawan sabagai Wali Nagari Barung Barung Belantai induk . Tapilihnyo beliau indak lain adalah buah dari kaparcayaan urang banyak, nan manaruh harapan gadang ka kapamimpinan nan adil, bijaksano, jo basandi adat jo syarak.

Amanah Wali Nagari ko bukanlah amanah nan ringan. Ibarat pucuak bulek di ateh undang undang tampek batumpu harapan anak nagari, tampek balinduang di hari paneh, bataduah di hari hujan. Kami yakin, jo ilmu, pangalaman, jo niat nan ikhlas,, sanggup manjalankan amanah ko jo hati nan lapang, pikiran nan janiah, serta langkah nan luruih, tahu di alua jo patuik, raso jo pareso.

Kami warga Rajo Agam barharap, di bawah kapamimpinan beliau Nagari Barung Barung Belantai induk makin maju jo baradat. Pambangunan indak hanya tampak di rumah gadang nan rancak, jalan nan luruih, atau sarana nan baguno, tapi juo tampak di hidup anak nagari nan makin sejahtera ekonomi nagari nan kuat, pendidikan anak kamanakan nan maju, serta adat istiadat nan tetap dijago jo dipakai. Mudah-mudahan nagari kito manjadi nagari nan aman, damai, jo basamo, tampek baduo jo sakato, basatu jo mufakat.

Kami juo berharap, beliau  sanggup marangkul ninik mamak, alim ulama, cadiak pandai, bundo kanduang, jo generasi mudo, supayo sagalo urusan nagari dapek disalasaikan jo musyawarah. Kok kusuik manyalasaikan, kok karuah manjaniahkan, indak ado nan ditinggakan, indak ado nan disisihkan.

Doa kito mairingi langkah beliau Mudah-mudahan Allah SWT salalu mambarikan kasehatan, kakuatan lahia jo batin, kasabaran, jo kabijaksanaan, supayo Beliau  sanggup manjadi pamimpin nan ditiru jo diteladani, indak gadang di kato sajo, tapi nyata di karajo jo pangabdian.

Akhia kato, kami manyampaikan sakali lai salamat jo sukses ateh tapilihnyo beliau Jon Arman Sutan bangsawan sabagai Wali Nagari Barung Barung Belantai induk. Mudah-mudahan amanah ko manjadi ladang ibadah, jo mambawo Nagari Barung Barung Belantai induk ka arah nan labiah elok, labiah maju, labiah sejahtero, maju salangkah, tinggi sarantiang, diridai dek Allah SWT.

#PILWANA #nagari #democracy(ramlischan media berlanpos.com)